Штогод 21 лютага адзначаецца Міжнародны дзень роднай мовы. Родная мова — важны сімвал культуры, які нічым не замяніць. Гэта багацце, зберагчы якое задача кожнага чалавека. У Сеўрукоўскай сельскай бібліятэцы ўвазе наведвальнікаў была прапанавана кніжная выстава-агляд “Чытаем-па беларуску?! Гэта цікава” з прадстаўленымі на ёй творамі мастацкай літаратуры, як для дарослых, так і для дзяцей.

21 лютага — не проста дата. Гэта дзень, калі ва ўсім свеце адзначаецца Міжнародны дзень роднай мовы.
Для ўсіх жа беларусаў родная мова — гэта, вядома ж, беларуская — самая меладычная, самая прыгожая і непаўторная.
Кожны год Сталовіцкая сельская бібліятэка ў мэтах далучэння сваіх карыстальнікаў да роднага слова арганізуе мерапрыемствы. Гэтым разам сумесна са Сталовіцкім КДЦ былі праведзены хвіліны паэтычнага настрою “Роднаму слову гучаць”. Карыстальнікі чыталі паэтычныя творы беларускіх аўтараў, удзельнічалі ў віктарыне і конкурсе загадак.
Ну і, вядома, усіх чытачоў чакала шмат кніг. У гэты дзень рэпертуар іх быў асабліва родным. На кніжнай выставе “Гімн роднай мове” былі сабраны самыя любімыя чытачамі кнігі беларускіх аўтараў.

Штогод 21 лютага адзначаецца Міжнародны дзень роднай мовы. І гэта не выпадкова. Без мовы не існаваў бы свет. У гэты дзень паўсюдна ўсе мовы прызнаюцца роўнымі, таму што кожная з іх ўяўляе жывую спадчыну, да якой людзі павінны сур’ёзна ставіцца і аберагаць. Ляснянская сельская бібліятэка да гэтай даты падрыхтавала віктарыну “Мая родная мова”. Юныя карыстальнікі ўдзельнічалі ў конкурсах “Словы гуляюць у хованкі”, “Крылатыя выразы”, “Дапоўні прыказку” і інш.

Гадзіна роднай мовы «Ад зерня – колас, ад слова – мова» да Міжнароднага дня роднай мовы адбылася ў Гарадзішчанскай ГпБ. Падчас мерапрыемства ў бібліятэцы прайшла акцыя «Якая наша мова…». Чытачы пісалі на стыкерах у форме сэрца словы і прыклейвалі на карту Беларусі. У канцы дня ўся карта Беларусі была ў сэрцах, на якіх напісаны словы аб роднай мове, такія, як: прыгожая і мілагучная, адметная, сакавітая, дзіўная, найлепшая, непаўторная і шмат іншых. У бібліятэцы была створана кніжная выстава «Калі вам да спадобы беларуская мова». Акрамя гэтага ў бібліятэцы прайшлі займальныя гульні і конкурсы на веданне беларускіх прыказак, страў і цікавых слоў «Перакладчык», «Прадоўжы прыказку», «Беларускія стравы» і інш.

Любіце, шануйце, паважайце родную мову, размаўляйце на ёй часцей!